Eric的玩樂格

今時今日嘅香港，就算你一個月收入有2,3萬蚊，其實都係一個基層市民，大家都要死慳死抵先儲到小小錢買支Bass，如果唔好好保養佢，邊度有錢買第二支呀？所以，我係以一個基層市民業餘愛好者來嘅身份同大家討論如何實用，慳錢咁樣保養我哋支Bass。

小小經驗嘅分享，有一啲係朋友度學到嘅，有啲上網睇到，如果各位有任何不同意見，麻煩通知小弟一聲，等我好改正，萬分感謝。

1. 保養次數
事實上，每次攞支Bass出來練嘅時候，我都會留意吓支Bass有無咩問題，基本上每個星期都會做個簡單嘅“護理”，例如用塊3M抹布抹吓個Body，然後檢查一下八度音和線高，仲有線嘅左右位置有無偏離佐個Pickup等等。(如果你支Bass唔係差得咁離譜，都好小會有呢啲問題嘅。) 你經常做呢啲檢查通常都可以及時發現任何出現在支Bass上嘅問題，並且及時的解決。好似人一樣，都要定期做Body Check，就係為佐及早發現問題，唔好比佢惡化。由於我用嘅琴線都係平價貨，為佐要保持一個良好的練琴狀態，通常3-4個月就要換線。這樣就經常借著這個機會抹吓指板等等。Keep住每3-4個月都有過比較好的處理，支Bass都會Keep到比較新淨，心情比較好，練琴都會舒服啲。

如果支Bass太耐唔保養，每次練琴留底嘅汗漬，污泥等痴係支Bass上面，日子有功，就會好難處理。當有一日你要換Bass嘅時候，將支咁有功績嘅Bass放上某群組想放佐佢，係人睇到都無興趣啦！

2. 清理污積
我係一個窮等人家，當然無咩錢買什麼護理套裝啦。基本上除佐金屬部分和Pick up之外，我都係用碧麗珠來清潔的，(提提大家，碧麗珠係咪真係可以用，大家要諗清楚。) 我覺得碧麗珠不僅能把污糟野去掉，而且果種痴手嘅感覺都可以除去。至於有一啲比較難清理的細縫，例如琴頸同和琴體的連接處，仲有最麻煩的琴橋，呢啲地方我都會用棉花棒或者軟身一點嘅牙籤將啲污糟推出來。但是有一點要注意，就係清潔啲Fret，我就唔會好用力咁將所有Fret縫隙的泥整出來，只是用牙籤朝住指板垂直的方向清理，我驚啲Fret會挑起佐，搞到條縫隙愈來愈大。

3. 檢查電子野
平價Bass嘅電子部份同Jack線位最容易出問題。之前用過一支A字頭平價嘅Bass，用佐無幾耐已經有雜音出現，而且愈來愈嚴重，最後成套電子野換曬先解決到個問題，其實上套電子野貴過支Bass，值唔值得換就見人見智。所以對於平價Bass，呢個我都無咩特別好嘅方法，除了諗辦法換高品質嘅配件之外，只能係平時使用的時候多加留意，例如扭啲制嘅時候盡量唔好太大力，同埋盡量扭慢一啲，唔好一野扭到底，避免碰撞電位器，仲有就係經常檢查電位器和Jack線位嘅螺絲有無鬆動，如果鬆佐就要及時扭返緊。 另外我係係電路倉放一包抗氧化劑，咁樣可以減小電路氧化的機會，不過注意要搵野固定好啲抗氧化劑，唔好比佢係入面朗來朗去。對於電子野耐唔耐用，我都係覺得貴價Bass始終係有個價值係度，樂器都係一分錢一分貨的。

4. 擺放
琴線對頸嘅拉力是很大的，呢一點相信係眾所周知的，所以在放置嘅時候要特別留意。平時放置嘅時候，如果大家有用琴盒，只要將支Bass平穩放入個盒就應該無咩問題，不過我就會習慣放幾包吸濕包，防止個盒入面濕度太高影響支Bass，當然自己都要定時留意一下支Bass嘅反作，發現有唔妥要快快去處理。因為有琴盒嘅保養，所以我覺得支Bass應該就唔會有什麼問題。但係如果用琴袋就唔同了，打直放，呢個情況，無論有無用琴袋，我都鍾意將支Bass嘅正面對著副牆或者搵其他野朗住，咁樣可以減小琴線對琴頸嘅拉力，當然咁樣擺放只係短時間。如果長時間的話，我會用背面做支撐，然後把琴線降一個或半個Key會比較好。有時練習嘅時侯練到一半需要放底支Bass去做其他野，如果無琴架，咁支Bass放係邊度好呢？直放又好似唔係好放心，怕佢企唔穩掉佐落來，咁惟有一係放係個袋上面，或者放係梳花，甚至放係張床度，最好的方法都係正面放，即係有線果邊向下，雖然咁樣會對電位器有小小影響，但是對琴頸保護更加重要，始終換電位器比換琴頸方便同便宜好多。

5. 琴架
呢個唔使點講啦，有多餘錢又或者屋企有位嘅，買個架就當然係最好啦，至於買咩款，大家自己去搵吓啦！